中環出更：連卓鋒升呢仁愛堂主席以身相許
仁愛堂尋日舉行換屆就職典禮，新任主席連卓鋒喺卸任主席羅台秦（Louisa）手中接下重任。早喺四月一日已開始履行主席職務嘅連卓鋒笑笑口話，已經初嘗做主席忙到氹氹轉嘅滋味，展望未來日日有活動，所以預咗未來一年要「以身相許」喇！
連卓鋒喺○六年就加入仁愛堂，至今達十三年。咁未來一年有幾忙呢？佢即拎出手機嘅行事曆畀卓妮睇，顯示未來一個月幾乎日日都已記錄咗一個「點」，即係日日有活動，仲唔止係一個添，所以家庭及事業都要暫時放埋一邊，瞓身為慈善。
戴凱倫留任總理 自己「埋單」
Louisa忙足一年終於可以抖吓氣，佢老公戴澤良就笑住話抖夠就要專注番喺公司業務喇！不過佢個女戴凱倫（Karen）就繼續留任做總理，仲話做父母的只會在精神上支持佢，至於做總理嘅使費就要個女自己「埋單」，自己支持自己喇！
Karen就話來年會專注於醫療，希望貢獻多啲，尋日佢仲獲頒「最熱心參與獎」金牌，總理黃曉妮同許友堅就分別獲得亞軍及季軍。許友堅話仁愛堂嘅服務範疇好大，佢會特別關注小童同老年問題，因為青少年已相對多人關注。
香港福建社團聯會前主席吳良好嘅新抱吳鄭慧賢今屆由總理升呢做副主席，尋日佢獲得最高籌款獎，坦言要多謝老公吳志龍支持，來年希望爭取最高出席率獎喎。照咁講，又要老公支持嘞，否則屋企五個年幼仔女點搞得掂？
卓妮