政情：引入外勞司機 勞福局 運房局 互推莊
職業司機高齡化問題愈來愈嚴重，唔少公共運輸服務嘅司機平均年齡都超過六十，長此下去服務實會受到影響。立法會航運交通界議員易志明為此就建議引入外勞，據了解，佢為咗呢件事不斷窮追勞工及福利局局長羅致光，要求盡快將司機納入補充勞工計劃內，但勞福局就覺得佢搵錯政策局，反叫佢搵運輸及房屋局局長陳帆處理車牌問題先喎。
易志明狙擊 羅致光卸責
政府今年一月回覆易志明有關公共小巴司機高齡化嘅書面質詢時指出，截至舊年底，六十至六十九歲持有有效公共小巴正式駕駛執照嘅人數達五萬七千多人，七十歲或以上就有一萬四千七百多人，八十歲或以上者有一千三百多人。雖則政府規定七十歲以上司機有醫生證明就可以繼續揸車，但七、八十歲日揸八小時，都咪話唔驚。
為咗引入外勞做司機，易志明已多次喺立法會大會、事務委員會同書面質詢上「狙擊」政府。有政府消息人士就透露，私下易志明亦不斷窮追羅致光，皆因勞福局就係負責外勞政策，但勞福局研判認為，就算真係開路畀運輸業引入外勞，但唔可能以國際車牌喺香港開工，本地與外地車牌亦唔係完全互通，覺得要運房局有政策配套支持先，有勞福局中人直言易志明搵錯局，感到冤枉。
問到係咪有不斷追勞福局做嘢，易志明直認不諱，兼且炮轟勞福局「亂噏」，話業界向佢反映幾十年前已經試過引入外勞司機，當時都無車牌問題，嘲諷話飲食界唔夠人，唔知局長會叫飲食界議員張宇人去搵邊個政策局呢？認為車牌問題只係「攞嚟講」。
兩政策局被斥各自為政
佢又話一個社會不斷發展，自然有工種會冇人想做，要維持正常服務就始終都要諗引入外勞，唔好話要保障本地人，依家係本地人唔願做，兼且香港已經係全民就業咗好耐。佢坦言政府只有一個，負責搞勞工嘅政策局見到一個行業唔夠人就要諗計，無理由要議員逐個局去拍門處理，直斥兩位局長根本喺度耍佢。
其實香港已面臨高齡海嘯，唔止司機，好多較基層、甚至厭惡性行業都有同樣問題，總有日會因人手短缺而無服務。兩個政策局互相「推莊」、各自為政，但民生事又豈能分得清清楚楚，唔通又要等到出事先肯認真處理？