政情：公民講場：單車館逢雨必漏 康文署管理爛透

將軍澳香港單車館啟用已六年，去年審計署曾批評康文署管理不善，單車館嘅營運同維修保養都有不足。呢頭鬧完，前日一場暴雨，咁啱遇上單車館警鐘誤鳴，就令到消防排煙窗自動打開，雨水湧入館內，導致積水處處，真係連救火嘅食水都慳番。有教練仲爆料話，以往每逢落雨都有小量積水，認為需要檢視賽道嘅結構。政府成日話支持香港運動發展，點知一個場館已經甩甩漏漏，仲要獲獎無數嘅「牛下女車神」李慧詩幫手抹地執手尾，政府有幾支持體育真係不言而喻，到底康文署署長李美嫦等一眾高官知衰未呢？