政情：八網難逃：太太抱恙無法夫妻檔 盧偉國獨自扮漁夫獻唱
立法會工程界議員盧偉國（WK）鍾意玩樂器，既吹色士風，又彈琵琶，中西式皆宜，平時亦鍾意入廚煮幾味，興趣多多。佢早排喺社交網站上載咗張相，見佢一身休閒打扮，揸住魚竿同攞住竹籮，唔通佢仲有另一個嗜好，就係釣魚？不過WK就話，其實佢唔係去釣魚，而係去唱歌。唱歌點解要着成咁呢？
帶竹籮魚竿表演粵曲
WK話，當晚佢原本要喺一個粵曲籌款晚會上獻唱，而且仲諗住夫妻檔，演繹上世紀六十年代嘅作品《幸運號碼》，點知老婆抱恙，咳唔停，無法出場演唱。WK就話人算不如天算，於是就即刻執生，改為獨唱諧趣粵曲《釣魚郎》，所以支魚竿同竹籮就係道具嚟嘅。
佢又話，呢首粵曲嘅內容係講述釣魚郎周末垂釣，藉住上釣嘅十種魚類諷刺人生百態及社會上嘅光怪陸離，旋律動聽熱鬧，曲詞生鬼絕倫，頗有警世意味，歷久彌新喎。