政情：業界呻租貴難頂 戲曲中心拍烏蠅

根據統計，戲曲中心大劇院喺今年一月、二月、三月，分別演出了十場、十二場、六場戲，使用率僅三成一，嚟到四月更加係「全面休息」，五月先再有節目。相比之下，另一個粵劇演出場地高山劇場就幾乎日日都有節目，四月份只得一日冇任何演出，旁邊嘅演藝廳亦只有四日留空。

曾叫細劇團去其他平租場地

戲曲中心租金昂貴可謂使用率低的主因，事實上，高山劇場日租只需幾千元，但戲曲中心就要大約七萬元，當中包括場租二萬二千元，同埋百分之八嘅票房收益抽佣等，兩者價錢相差近十倍。

翻查資料顯示，劇曲中心開幕前已醜聞不斷，唔單止最初冇邀請粵劇界大工會八和會館統籌同參與開幕儀式，掀起一場風波，甚至當時已被批評租金昂貴，細劇團難以負擔，可惜民政事務局局長劉江華早前解釋，話戲曲中心定位清晰，係殿堂級場地，叫未夠班嘅新秀或劇團去其他平租嘅場地表演，暗示無意減租，結果咪搞到拍晒烏蠅囉！

充撐使用率 工程綵排都計埋

西九管理局回覆傳媒查詢時解釋，大劇院因為四月有工程，所以不接受租用，預計五月至出年三月使用率可達七成半，仲話場地使用率唔係只計演出日子，仲包括劇團綵排、入台、離台等，甚至連內部提升工程都會計埋，咁計法唔怪得使用率可以突然躍升成倍喇，咁不如安排觀眾睇埋劇團綵排、入台、離台啦，又或者搵西九文化區管理局行政總裁栢志高去做鬼佬大戲戥場充數囉！

立法會民政事務委員會副主席區諾軒批評，戲曲中心開幕前，業界已經不斷批評租金貴，當中不乏粵劇界名伶、大劇團，加上限制多多，例如西九管理局會就表演錄影，繼而擁有相關版權，而場地亦唔係特別便利，種種原因加埋造成使用率低。至於點樣改善，區就話一定要調整營運策略，當中減租最實際，否則等同浪費咗二十七億元去興建戲曲中心喇！