中環出更：申報任拉麵公司獨立非執董 何俊賢進軍飲食界？
立法會議員當中，唔少都係上市公司嘅董事，根據立法會議員個人利益登記冊，立法會漁農界議員何俊賢（高佬賢）最近就申報出任一間售賣日本豚骨拉麵嘅公司嘅受薪獨立非執行董事。唔通佢諗住他朝或會轉換跑道，進身飲食界大展拳腳？
稱朋友邀請兼試過好食
根據議員個人利益登記冊資料，高佬賢喺二月底申報做咗一間上市公司嘅受薪獨立非執董，而該公司嘅業務性質係提供正宗傳統嘅日本豚骨拉麵。高佬賢接受查詢時就話，佢係獲該公司老闆邀請出任獨立非執董嘅，對方都係新界嘅朋友，同對方已認識一段時間，不過唔算好熟。高佬賢又話，佢都唔係隨便就應承人哋加入o架，事關佢都有親身食過佢哋啲拉麵，覺得真係好食，同埋都有睇過間公司嘅發展方向，覺得冇乜大問題，先至決定加入。
問到點解該公司嘅老闆覺得佢係合適嘅人選，高佬賢就認為同佢係立法會食物安全及環境衞生事務委員會委員有關喎。
卓妮