政情：歐陽伯權復活節同太太煮飯仔

把握上任前空檔

Rex尋日下午同太太去中環ifc行街，兩口子去咗超級市場買餸同健康食品，見佢哋行特快付款通道，睇嚟只係買咗少少嘢。Rex話，復活節假期會留港消費當抖吓，而平時放假多數都會玩煮飯仔，直言煮飯仔已經近乎係指定節目喇，睇嚟佢選擇把握上任前時間，爭取同太太下廚嘅機會喎。

Rex仲講到，現時已經睇緊港鐵文件熟習吓，但工作仍未算忙，亦有留意近日有人擅闖輕鐵路軌事件，大讚員工處理得宜，似乎未上任先冧員工打好關係喎。佢覺得乘客應該要自律，事關港鐵每日接載近六百萬乘客，如果乘客做到先讓他人落車，每班列車起碼慳到十秒時間，直言車程會更暢順，繁忙時間嘅班次都可以更密嘞。