政情:收料站:斟酌會章 本土派或暫緩加入區政聯盟

民主黨(白鴿黨)新界東支部舊年爆退黨潮,以前綫派系為主嘅數十人一齊退出,並屬意另組聯盟。綜合多方消息,聯盟名稱已敲定為「區政聯盟」,但因本土派對會章些少字眼未有共識,有機會最後要暫緩加入聯盟。

據了解,聯盟成員以新界東地區人士為主,包括被稱為「前綫四大天王」嘅大埔區議員區鎮樺、「沙田區政」召集人兼區議員丁仕元、區議員李永成,以及將軍澳民生關注組柯耀林。各人喺各區邀請志同道合嘅人士組成聯盟,光譜由「淺黃」至「深黃」都有,兼不乏小量本土派。

兩周內無共識 仍會合作

有知情人士透露,本來喺今個月就會正式公布會章同介紹組織成員,但係近日有成員對會章字眼有所斟酌,而要押後同公眾見面。聯盟希望盡量喺兩星期之內傾掂數,如果唔成功,或者有幾位本土派人士先暫緩加入,稍後再作打算,但係仍然會有合作。

第一手消息請下載on.cc東網iPhone/iPad/Android/Windows Phone Apps