政情：平機會被批「無牙老虎」 朱敏健有排執漏
平等機會委員會經常被外界批評係「無牙老虎」，平機會主席朱敏健尋日履新，對於有關批評，佢就話︰「做無牙老虎有無牙老虎嘅生存方法，亦都可以解決到問題嘅」。吓，無牙老虎仲有用咩？
反歧視「嚴刑峻法冇藝術可言」
朱就話，處理平機問題靠嚴刑峻法就冇藝術可言，唔會得到永恒解決，所以要達到反歧視，就要靠移風易俗、教育民眾改變觀念至得。
朱尋日多次被問到點睇同性戀、同志婚姻等問題，但佢就拒絕表明個人立場，只係話自己所講嘅立場就係平機會立場，若有任何群體受歧視，平機會會代其尋求公道。對於多屆平機會主席都未能促成政府就性傾向歧視條例立法，佢就話︰「我尋日冇，唔等如聽日冇」，要積極樂觀，立法前要廣泛諮詢。
佢又話，香港目前未有法例處理同性婚姻，若有人認為落後，就即刻要做到全世界最先進，會做出未經深思熟慮嘅「產品」，反問︰「我哋係咪應該純粹為先進而先進呢？」強調如未能達成社會共識，即使立法都保障唔到少數人士嘅權利。