政情：創科局落後Fb都玩唔掂
為咗推動創新科技，政府喺一五年成立咗創新及科技局，但呢幾年唔單止創科進度「龜速」，就連玩Facebook（Fb）都玩唔掂。議員鄺俊宇（Roy）尋日喺立法會財務委員會特別會議中，仲嘲諷創科局嘅Fb得五千幾人like，貼文like數更加寥寥可數，更甚嘅係問到創科局局長楊偉雄滿唔滿意呢個數字時，佢竟然避而不答，話唔想同其他局比較，只係重申市民得益最重要。唔通佢都覺得呢個數字太羞家，所以唔敢答？
應用程序、社交媒體日新月異，今時今日Fb都開始畀人話落伍，但負責創新科技嘅創科局竟然連Fb都搞唔掂，實在相當諷刺，Roy當時都有問到局方諗住點樣搶救，但楊就解釋該局嘅工作並唔係全面對外，都有好多內部工作，所以冇特別請人去管理個Fb。言下之意似乎就覺得唔需要搞，楊仲話數字比過往有進步，同會繼續努力咁話。
做嘢歎慢板 設施要「等到天光」
事實上，科技最忌就係「慢」，有時上網頁要等幾秒都已令人覺得唔耐煩，偏偏創科局做嘢就歎慢板。議員謝偉銓（Tony）都有開火炮轟創科局樣樣都慢，例如要等到今年底先落成到八十五支智慧燈柱，專線小巴實時情況就要出年年中先開始試驗，仲話康文署設施更加需要三年，直斥「等到天光」，Tony強調科技發展喺兩、三年間嘅變化可以好大，反問政府慢到咁又點做「智慧政府」呢？
另一名議員楊岳橋（AY）就好關注政府工作效率，特別問到效率促進辦公室自舊年撥入創科局後，有冇簡化到政府服務行政程序，殊不知效率專員聶世蘭回覆時只係用咗寥寥幾句話有全面計劃，冇提及任何工作細節，激到AY質問效率辦係想「打發議員」定係根本冇做過嘢？聶先解釋，話誤會咗AY係想知道效率辦嘅未來工作，所以先冇提供細節，絕對唔係「打發議員」，過往嘅工作可以提交番資料咁話。
創科局唔單止政策做唔好，連啲基本溝通、宣傳都唔識做，再係咁落去，睇怕香港喺創科方面永遠都要慢過人幾拍喇！