中環出更：不滿否決放寬海外醫生 張宇人提休會辯論
本港醫療人手緊張，醫務委員會早前仲否決咗放寬非本地培訓專科醫生考試後免做實習嘅安排，外界紛紛表示失望。一直提倡本港應輸入海外醫生，以應付醫護人手短缺問題嘅飲食界立法會議員張宇人（Tommy）亦大表不滿，仲計劃喺立會提出休會辯論，唔通佢想逼政府做番啲嘢？
話並非要逼政府
根據立法會內務委員會文件，內會今日將會處理有關Tommy尋求內會同意，喺下月十五日嘅立法會大會上，就醫委會否決放寬非本地培訓專科醫生實習要求方案事宜，舉行休會辯論嘅議程。Tommy接受查詢時話，知道都有唔少議員都對醫委會嘅決定感到不滿，所以希望可以提出休會辯論，畀議員發表意見。佢話同時亦都等政府可以就此事回應，畀醫委會知道議員意見，並非要逼政府。
佢仲話都諗過唔同方法，包括提出緊急質詢同無法律約束力議員議案，但認為休會辯論係最快嘅方法。不過醫委會主席劉允怡已承諾喺下月八日醫委會會議提出動議，讓醫委會再次討論及表決方案。Tommy個議案要到下月中先提到，唔知到時會唔會太遲呢？
卓妮