中環出更：冒病赴日追櫻袁莎妮冇心機留倩影
最近日本櫻花盛開，好多名人都爭相飛撲去追櫻，香港總商會總裁袁莎妮（Shirley）都唔例外。不過見佢喺Facebook擺嘅都係風景相，唔見人，仲留言話自己帶住大感冒去追櫻，最慘都係「身邊那個」，悉心照顧佢之餘，仲幾乎全程都係食烏冬同埋茶漬飯。問真啲，佢話今次病到五顏六色，冇氣又氣喘，咳到傻咗，所以冇心機影自己個醜樣喎！聽落又真係幾冇癮嘅。
Shirley話今次旅程只係食藥同瞓覺，形容得番半條命。佢仲講笑話唔知係老咗、弱咗，定係啲菌勁咗，搞到佢人都謝晒。平時佢笑臉迎人，又精靈，聽佢咁講應該真係病得幾辛苦，不過有老公全程陪住，幾辛苦都甜入心喇！
盧偉國讚鰻魚飯好食
立法會議員盧偉國（WK）就同一對加拿大好友同遊關西賞櫻，其中有兩晚住喺和歌山，原本想帶老友去試吓佢同太太都鍾意嘅鰻魚飯店，點知去到遇上東主休息。離開和歌山之前，WK對鰻魚仍然心思思，於是上網搵到一間喺去關西機場途中嘅專門店，結果一去到見停車場泊滿車，空氣中仲傳來陣陣烤鰻魚嘅香氣，就知道搵啱咗啦！
WK叫份「特重」鰻魚，打開一睇，飯面鋪咗一整條肥美嘅鰻魚，燒得外脆肉軟，甘香豐腴，米粒沾上特製醬汁，配上鰻肝湯，形容好味到「神仙都企唔穩」喎。
香港長者產業聯會會長蔡少偉（William）同太太都去咗日本大阪，主要係傾談日本農業科技及創新項目生意，順道觀看櫻花，仲趁機去參觀人比較少的寺廟及神社，當然少不了享受美食。William話當地櫻花品種有幾十種，係賞櫻的首選之地，不過開花嘅季節好短，已經快到尾聲，要睇就要拿拿聲起行啦！
卓妮