政情：鍾海燕為環保「放養」凋謝蘭花竟再開
逢親農曆新年，好多人都會買一大盆蘭花應景，不過多數人等啲花凋謝後就會丟棄。國際華商協進會理事鍾海燕（Heidi）都好喜歡蘭花，時不時就會買一小盆返寫字樓，但佢覺得花謝咗就丟掉好可惜，又唔環保，於是就咁放喺公司窗邊曬太陽，估唔到無耐蘭花又再含苞待放。依家寫字樓儲埋儲埋已有十幾盆唔同品種嘅蘭花，搞到好似成個花園咁。
好多人都話蘭花難種，太過嬌氣，Heidi笑笑口話不知幾容易。佢大約五年前開始保留啲謝咗嘅蘭花，得閒諗起就淋吓水，有時幾個月先淋一次，亦冇落花肥，可以話係奉行「放任政策」，幾個月之後就會見到發出新枝同花苞。依家公司擺嘅蘭花都係謝完又開。古語話「無心插柳柳成蔭」，Heidi都算係「無心種花花盛開」喇！
興奮到叫同事嚟睇
做保健品生意嘅佢仲經常教身邊朋友要放鬆腦神經細胞，喚醒「開心賀爾蒙」，又笑笑口話每次發現蘭花有新芽或花苞時，個腦即刻「叮」一聲，興奮到叫同事嚟睇，明顯感覺個腦釋放咗開心賀爾蒙。有時工作忙累，抬頭睇到啲五顏六色嘅花，成個人都醒晒。佢仲話退休之後，打算專心睇書學種蘭花，搵個鄉郊地方種，到時送畀朋友等大家都開心吓。