政情：梁君彥換主席座駕花71萬冇超支
立法會主席梁君彥換LC1主席座駕惹來外界關注，立法會秘書處回覆議員嘅預算案書面問題時披露，原本用咗超過八年半嘅LC1，即Lexus（凌志）GS450h房車已經喺舊年十一月初註銷，而新嘅LC1嘅型號係Lexus LS500 Executive。立法會秘書處補充，話喺二○一九至二○二○年度，立法會車輛嘅維修保養開支總額預計為八萬三千元。
車款價格惹熱議
梁君彥換新嘅LC1嘅消息曝光後，有團體喺Facebook提出兩點質疑，第一，立法會舊年只係預咗九十萬元去換LC1，依家LS500 Executive街價要一百四十萬元，係咪存在超支買新車；第二，據網上資料LS500 Executive車內有按摩座墊，質疑公帑嘅運用係咪合適。
立法會秘書處回覆傳媒查詢時話同港府安排一致，秘書處購買嘅車輛毋須繳付首次汽車登記稅，今次購買嘅LC1實際費用約為七十一萬元，符合九十萬元預算，並冇超支。秘書處又指有關車款備有普通版及豪華版，而秘書處係購入普通版，冇配備按摩設施。