政情：張宇人鍾國斌拉布勁燒百萬公帑

根據立法會秘書處最新就財政預算案回覆財委會嘅資料，披露財委會、工務小組及人事編制小組就處理中止或休會待續議案嘅時間，喺二○一六至一七年度，三個委員會共花二十七小時四十分鐘，使逾七百五十二萬元，一七至一八年度已大幅暴跌至兩小時五十三分鐘，花約六十五萬元，一八至一九年度、截至今年二月卻回升，達四小時二十三分鐘，花費逾一百一十七萬元。

反撤對沖開位建廚餘廠

點解會低位回升？翻查紀錄，舊年十一月財委會審議造價五千萬元嘅觀塘音樂噴泉撥款時，泛民拚死一博提中止圖拉倒撥款終被否決，之後到審議勞工處開位負責搞撤銷強積金對沖，代表商界嘅自由黨紡織及製衣界鍾國斌出手，喺財委會提中止叫政府返去諗清楚先搞，最後亦逃不過被否決的命運。

工務小組花咗一小時四分鐘處理中止或休會待續議案，就要「歸功」於鍾國斌黨友、飲食界議員張宇人，佢不滿環境局喺北區沙嶺興建廚餘廠貴，兼且不符成本效益，即場策動建制派反政府，成功中止議案「發還重審」。據了解，政府已成功冧掂張宇人，令工程成功喺工務小組通過，相信下關財委會亦會暢通無阻。

肇因高官懶搵建制幫手

此外，民主派拉布第四招係提出臨時動議，根據秘書處資料一八至一九年度、截至今年二月，財委會處理臨時動議就花兩小時十二分鐘，涉款逾五十九萬元，工務小組則花十一分鐘，使約四萬九千元，人事編制小組則為五十五分鐘，涉及二十四萬元。

世界各地議會都有拉布，但都係喺必要時、民意強烈嘅時候出動嘅呢個「撒手鐧」，反之民主派就濫用拉布，而班高官連搵建制派幫手都懶，令建制派議員不滿要拉埋一份。白白使多咗錢，最終邊個係受害者？咪係納稅人囉！