中環出更：改善擠塞 洪文正：智慧出行更勝道路收費
香港又多一個志願機構。半島東扶輪社日前成立，創社社長係IT人洪文正。雖然新成立嘅扶輪社分社係以九龍半島東南面為服務範圍，但塞車係全港巿民都會面對嘅現象，對於政府有意喺中區試行電子道路收費先導計劃，洪文正認為效果有限。
洪文正話道路收費嘅原意係要藉使用成本來調節繁忙時段嘅汽車流量，但前提係要提供免收費道路，供時間充裕嘅駕駛人士選擇，否則道路不足之下，道路收費與否其實都意義不大，所以佢主張建立一個方便巿民智慧出行嘅應用程式，畀巿民可事先掌握到邊一條路線係最快捷，或邊一種交通工具最符合成本效益，咁就可以更有效使用路面資源，改善擠塞狀況。
佢又話巿民要智慧出行，首要之務係各個交通機構都要提供開放數據，但礙於目前香港嘅交通機構都各自為政，睇嚟短期內都難用開放數據去解決道路擠塞。
當晚嚟撐場嘅仲有金紫荊女企業家協會常務副主席鄭美恩、中區扶輪社創社社長黃仰芳、傑青會主席趙傑文同鄰舍輔導會副總幹事彭桓基。
黃仰芳駛入中區 寧留買路錢
黃仰芳亦覺得電子道路收費未必可行，因為真係有需要揸車入中區嘅話，係唔介意留下買路錢，但佢話自從中環灣仔繞道通車之後，中環往來銅鑼灣嘅交通已有所改善。
本身係醫護界人士嘅九龍塘扶輪社財務長黃碧枚，就覺得電子道路收費計劃行得通，譬如佢到中環出席半島東扶輪社嘅成立典禮，係將私家車停泊於九龍站附近，然後再搭一個站嘅港鐵到中區，咁就慳番西隧收費同中區高昂嘅時租停車場費用，但中區要路路暢通嘅話，電子道路收費必須要配合完善嘅泊車轉乘先至得。
卓妮