政情：今日你上鏡：蒙德揚去上環必買蝦子麵

上環嘅大街小巷有好多香港嘅懷舊美食，早前有一日下午，見到香港話劇團主席蒙德揚（David）徒手拎住兩包麵，原來當日佢到上環文娛中心做完嘢之後，特登走去文咸東街一間老牌麵店買冬菇麵同埋蝦子麵，佢鍾意食蝦子麵，個女就鍾意冬菇麵。David話雖然香港有好多地方賣蝦子麵，但係佢特別鍾意呢間，只需用滾水煮四分鐘，乜嘢都唔使落就好好食喇，因為會出啲蝦子味喺湯度，所以佢嚟親上環就會買。見佢當日每款只買六隻，佢就話啱啱好，趁新鮮食，食完再買過咁話喎，認真識歎。