政情：冇影遭圍插 兩政助立會急補鑊

坐足全程聽特別質詢

喺上星期嘅立法會會議中，楊寶蓮同馮英倫變咗箭靶，其中有議員話上任至今未收過前者電話同短訊。事隔一星期，楊寶蓮同馮英倫都坐足全程聽特別質詢，睇落仲好留心添！

平日較少機會見到楊寶蓮，佢就否認少落立法會，笑話「可能你見唔到我啫」，因為平日舉行立法會會議期間，佢多數喺會議廳前廳。佢仲話工作多寫網誌、演詞等，都會將有關文章傳畀議員，所以有同議員聯繫，不過都會繼續努力，而路過嘅勞工及福利局副局長徐英偉都有幫口話楊寶蓮好勤力。唔知班議員認唔認同喇！