政情：審國歌法防再甩轆建制編更鬥泛民

政府目標喺七月立法會休會前通過國歌法，由建制派班長廖長江任主席執掌法案委員會。委員會喺上周六已進入逐條審議階段，會議尾聲時，廖長江同民主黨許智峯（峯鴿）就劃線限制議員發言起爭執，期間民主派議員區諾軒要求點算法定人數，廖則將峯鴿逐離會議室，當時建制派議員飛撲返回會議室都未夠法定二十一人，幸好夠鐘完會，避過流會收場。

七大板塊按比例計人手

咁驚險嘅過程，建制派仍然未有經一事、長一智，繼續到場點名就走，喺本周一會議再度上演險流會嘅經過。廖長江喺會議尾聲加會十五分鐘，但冇人發言，想進入審議下一條條文再同民主派嘈交。人民力量陳志全要求點算法定人數，最後得十九個人喺會議廳，同樣因夠鐘而冇事。有建制派會後笑泛民搞流會冇得逞，聲言只有會議完結冇流會。

有資深建制派議員透露，見過兩次鬼終於識驚，為免甩轆出醜，決定重推編更制，七大板塊按議席數目比例計算人手，以法定二十一人為基本盤，擁十三議席嘅民建聯每次要派約六人駐守立法會、有七席嘅經民聯則約三至四人、六人組則為三人、工聯會二至三人等，由建制派副班長陳克勤負責排更。

為公平冇藉口互相指摘

另一建制派中人形容，上兩次會議欠數名議員先夠人數，真係流會冇人「孭鑊」，為咗公平兼冇藉口互相指摘，一致同意推行編更制，以達致共同負責，出事時起碼冤有頭債有主嘞。據了解，國歌法編更只係熱身，稍後就修訂《逃犯條例》嘅法案委員會將延續編更，慎防甩轆。

建制派對上一次咁有系統協調，已經係前年修改《議事規則》嘅時候，此後民主派最大彈藥就係點算法定人數，故只要建制坐定就可以應對。可能太耐冇打硬仗，大家都鬆懈落嚟，有建制派只負責加入委員會甚少現身惹微言，編更就迫使大家重燃戰意！