中環出更：不在席提唔成草案 梁繼昌Fb認衰
立法會原定尋日審議，由立法會會計界議員梁繼昌提出嘅《2018年專業會計師（修訂）條例草案》，但由於梁唔在席，所以立法會主席梁君彥就宣布，唔會處理呢個議案。事後仲推咗畀同屬專業議政、草案委員會主席莫乃光，話係因為佢唔在席，所以冇人動議議案喎。搞出個大頭佛，梁最後喺Facebook貼文認係扮甩轆。
梁同莫乃光都唔喺會議廳
事實上，梁同莫當時都唔在席，梁當時喺連接會議廳嘅側門步出，仲話應該係要等莫以條例草案委員會主席身份就委員會報告發言，然後再提出動議。至於莫就叫傳媒問番梁，到底當中發生乜事？
草案係禁止冇會計師資格嘅人士、或者唔符合執業要求嘅公司用「專業會計師」字眼，但民主黨涂謹申認為會對中小企會計事務所同其他提供合法會計相關服務嘅從業員嘅生存空間，造成嚴重同廣泛嘅影響。
據了解，梁一直冇做拉票工作，直至涂喺早幾日去信畀全體議員解釋反對理據後，佢先去信畀議員拉票。雖然冇拉票，但由於佢係諮詢會計師公會嘅意見後先提出修訂，所以建制派都傾向支持。
到底係特登製造甩轆現象抑或真係唔夠票？兩樣都係，梁今晚喺Facebook認衰，承認需要更多時間游說各黨議員支持，所以佢尋日押後恢復法案二讀程序，仲話實在情非得已，叫大家原諒佢喎。
卓妮