中環出更：洗手液洗爛手 林建康爆消委會做緊研究
最近公眾地方洗手間嘅洗手液有好多細菌，有報道仲話有人用到皮膚爛添，搞到人人都好擔心。卓妮早前喺馬場同身兼消費者委員會委員嘅愛沙尼亞共和國駐港名譽領事林建康傾開呢件事，佢仲爆料話消委會最近已經做緊有關洗手液嘅研究。
原來消委會好貼地，反應好快，即刻已經開始做研究啦，聽落好似快有結果。林建康話消委會依家研究邊隻洗手液帶乜嘢元素，到底係咪可以消毒，消費者可以揀吓，做完研究後就會公布。
林黃寧艷外遊專揀新酒店
林建康嘅太太林黃寧艷就話平時好難帶埋洗手液出街，但出trip就會帶定啲消毒紙巾、消毒潔手液，上到飛機通常都會周圍抹吓，例如遙控、座位旁邊嗰啲位置，不時都暗藏細菌，至於外遊就會揀啲新嘅酒店，就冇咁容易污糟。
仁濟總理孫蔡吐媚都話平日喺公眾地方嘅洗手間用洗手液時，會特別沖得乾淨啲，而出門外遊時，去到酒店都會特別抹吓遙控等等，咁就夠晒乾淨啦！
轉頭見到中華廠商聯合會副會長、「家電大佬」陳國民話，外出都好少帶洗手液，都係要用公眾洗手間提供嗰啲，都唔驚得咁多o架啦，幾廿年都係咁，出trip去到酒店有時都簡單抹吓先，不過都好難好積極咁抹，但就會帶埋旅行用嘅水壺連杯，唔使用酒店提供嘅，咁就夠晒乾淨啦！
卓妮