港鐵近排發生多宗事故，搞到市民好頻撲。卓妮早前喺一個活動上見到香港中華廠商聯合會常務會董方平，佢話通常會預早出門搭車，所以冇遇到過因港鐵事故而受到延誤，但係市民經常搭港鐵返工放工，佢都話唔知港鐵搞乜嘢，事關搞到咁唔止影響市民，亦都影響香港嘅聲譽，佢仲質疑唔知係咪港鐵以往聲譽好，搞到驕傲得滯，認為港鐵高層應該檢討吓。
當晚嘅活動係海外潮人企業家協會（協會）就職，協會秘書長林月萍就好忙咁四圍招呼賓客，當時仲見到香港潮屬社團總會常務會董胡炎松，佢都係港鐵常客，因為佢家住西貢，若果要去港島，佢就先揸車去將軍澳，擺低架車喺停車場，然後就搭港鐵過海嘞！佢話搭港鐵比較好，可以有時間覆電郵同睇文件喎。
提起交通延誤，香港工商專業協進會永遠榮譽會長朱鼎健就有一個深刻嘅經歷。話說有次佢喺美國公幹，要轉乘內陸機去另一個地方開會，點知因為太大風，內陸機唔能夠起飛，當時行李落唔到機，人就上唔到機，惟有急急轉乘長途巴士，好彩啲重要文件都放晒喺手機，最終亦趕得切開會啫！而嗰次開完會，返埋香港之後，啲行李先由美國抵港。
雖則搞到咁麻煩，但朱鼎健認為急都急唔嚟，有時候係需要調節心態，例如同自己講咁可能係避過一劫哩！佢仲話為咗身體健康，每日都會行一萬步，若果遇到飛機延誤，佢大可以喺機場踱步，唔會嘥時間。
東華三院主席蔡榮星就話有次由法國搭火車去意大利，中途火車延誤，全部人困喺車廂幾個鐘，影響行程，部分地方去唔到，梗係影響心情喇！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
