中環出更：三隧分流「難產」 運房局枉燒169萬
政府提出嘅三隧分流議案日前已「壽終正寢」，當局疊埋心水等收回西隧再算。不過，自舊年《施政報告》提出方案後，運輸及房屋局隨後鋪天蓋地式做宣傳頂住反對意見，包括曾派副局長蘇偉文粉墨登場扮茶客歎咖啡硬銷方案，原來「埋單」計使咗近一百六十九萬元！
運房局回覆查詢時指，局方同運輸署分別喺部門網頁同社交網站發放廿條宣傳短片，亦透過唔同媒體嘅網站、手機應用程式同Facebook網頁落廣告做推廣，製作短片同廣告嘅開支共約一百六十七萬元。而運輸署亦製作咗多條橫額掛喺港九不同地方，涉款約一萬七千元。
市民唔信政府 徒勞無功
政府推銷三隧分流以嚟，成日話要令公眾明白方案嘅效用同埋點樣做到分流，所以宣傳片亦從多方面打「輿論戰」，邀請的士司機、大學教授、運輸研究學會會員等講解效用，甚至扮網媒做街訪問吓市民慳多咗時間會做乜等。使咁多錢做宣傳的確好過以往靠運房局局長陳帆齋噏，可惜捉錯用神，核心在於市民對政府信任不足，冇人敢寫包單加完價實做到分流。
卓妮