近日香港爆發麻疹疫情，唔少機場職員紛紛中招，所以衞生防護中心總監黃加慶尋日都派人去機場，幫機場職員打麻疹疫苗，不過就畀人鬧爆安排混亂。事關接種疫苗名額，上午同下午時段加埋只派幾百個籌，未開始已派晒籌，就算有機場職員提早一個鐘去排隊都未必有針打。有職員亦狠批呢項安排冇考慮夜勤職員，只係照顧朝九晚五嘅職員。雖然黃加慶傍晚知衰補鑊，加多四百針，但查實機場職員多達二萬人，有排都打唔完。唔通當局要等到疫情大爆發，先至識得加快進度？
