政情：湯修齊同囡囡減肥成功 勁擦壽司慶祝
家庭與學校合作事宜委員會主席湯修齊（Henry）一家四口感情好好，早前就一齊出街食壽司，食完仲玩埋層層疊，高到連人都幾乎望唔到，唔知咩事咁好胃口呢？原來Henry同女兒湯芷穎（Athena）近月進行瘦身行動，兩父女成功各減咗八磅，所以就大解放勁擦壽司慶祝吓喇！
大解放完又要運動戒口
Henry話，兩父女做運動同戒口雙管齊下，佢清早起身跑步，Athena就放學後學跆拳道，加上嚴格控制食量同埋遠離高熱量食物，兩人都清減唔少。為慶祝瘦身成功，Henry特別請Athena大解放食壽司，連埋太太同大仔，四人一次過食咗三十幾碟。
Henry話，其中淨係Athena一個人就食咗十幾碟三文魚壽司，事關個女鍾意食。三文魚脂肪比例高，Athena為咗瘦身已經停食幾個月，所以今次真係「大解放」喇！不過食多咗點算？Henry話，聽日再繼續努力運動同戒口咪得囉！