政情：栽種助減壓 容海恩變多肉粉
雙職女性壓力好大，好似幾個月前啱啱生咗B女嘅立法會議員容海恩（Eunice）咁，議會工作繁重，又要顧家兼湊B，都咪話唔吃力，仲搞到佢變咗「多肉粉」。「多肉粉」究竟係乜嘢嚟o架？食得嘅？大家搞錯晒嘞，唔食得o架，係就係「粉」，不過係Fans（粉絲）個粉呀！「多肉」係植物嚟o架！
點綴議員辦公室
話說Eunice日前喺社交網站Facebook上載咗幾張相，仲貼文話自從喺立法會議員房間辦公後，一直都喺辦公室內種盆栽，點綴吓。早前有網友上載咗一張相片，指佢栽種嘅植物當中有一盆「多肉植物」，其後照片仲被上載至種植交流嘅討論區，因此引起佢對植物嘅興趣。
Eunice早前就專登去花墟買多幾盆多肉植物，仲話用心照顧呢啲綠色植物，畀佢哋好好成長，相信係佢喺工作、家庭同埋湊女以外，最花心思嘅事嘞。不過佢樂此不疲，覺得有助減壓同陶冶性情。由門外漢變咗「多肉粉」，呢啲咪叫做無心插柳柳成蔭囉！