政情：院舍低薪逼引入外傭 吳秋北斥政府幫兇
安老院舍長期人手不足，政府鬆口話構思緊引入外傭，唔止觸動勞工團體嘅神經，亦令數十萬聘請家庭傭工嘅僱主擔心日後請外傭難上加難。曾擔任勞工顧問委員會（勞顧會）勞方委員嘅工聯會會長吳秋北（Stanley）就炮轟，政府長期懶得規管安老院舍，任由院舍以低薪策略，搞到冇人入行，然後迫使政府同勞工界就範，工聯會依家仲有成員係勞顧會嘅一分子，一定會把好關咁話。睇嚟勞工及福利局局長羅致光要打醒十二分精神喇！
促規管行業待遇 解決人手短缺
Stanley話，依家打工仔搵工嘅選擇多，安老院舍嘅員工月薪大約一萬三千蚊，但係體力勞動大，搵咩人去做呢？直言「做保安好過喇，唔使咁辛苦。」佢又話，該行業長期低薪，冇人入行，長者乏人照顧變成社會問題，業界就順理成章，迫使政府認同行內人手短缺。與此同時，政府驚自己買位嗰啲安老院舍服務差，被家屬唱衰，自然就肯引入更多外勞，搞到依家構思容許院舍聘請外傭。
咁勞工界究竟係贊成定反對呢？Stanley一講起就有火，佢話依家出街會被屋企有老人家嗰啲街坊鬧，因為佢主張院舍畀高啲人工請人，長者入住嘅費用高咗，啲商界老細就會放話：「嗱！就係吳秋北令到老人家入住院舍嘅成本高咗……」搞到佢有啲投鼠忌器，喺呢個議題上有所顧忌。不過佢誓言工聯會一定會把好關，事關勞顧會每月都會審批有關輸入外勞嘅申請，如果好唔合理就唔會放行，例如一定唔同意資助院舍輸入外傭，因為政府唔可以帶頭輸入喎！
講開又講，依家連日本都用永久居留權嚟搶護理人員，香港就算想引入外傭，未必夠同人哋爭喎！Stanley都有同感，認為安老院舍若想徹底改變厭惡性工作嘅形象，最關鍵係政府要下決心規管，喺加強培訓、提高薪酬福利及引入輔助器材以改善工作環境着手，多管齊下。講起厭惡性工作，佢又忍唔住鬧話，以前政府醫院有「厭惡」津貼畀照顧行動不便老人家嘅醫護人員，依家都冇埋添！