中環出更：區議員憂水管屋杯水車薪 變打卡熱點
荃灣區議會尋日開會討論喺區內引入水管屋做過渡性房屋嘅項目詳情，由負責推動項目嘅仁濟醫院代表介紹。出席嘅區議員對水管屋有讚有彈，有人更擔心會成為大媽專程打卡熱點喎！
嘆荃灣劏房呎租貴過豪宅
仁濟主席馮卓能簡介項目時話，管道樓高三米，空間感較大，管內會提供獨立廁所同煮食空間。佢哋計劃向政府申請一筆撥款用於推展，租金會低於市價，並以荃灣區居民優先。區議員黃家華就話，荃灣劏房呎價有啲仲貴過區內臨海豪宅租金，住戶喺床廁上煮食已不足為奇，故支持多啲興建，但係過渡性房屋嘅數量只係幫到好少人，只係杯水車薪。
區議員林琳就表明反對選址，認為會造成交通擠塞、噪音以及排污問題，又擔心水管屋會成為景點，日後大媽會專程嚟打卡喎。亦有人炮轟政府唔肯負責，將過渡性房屋外判畀團體，大鬧運輸及房屋局局長陳帆信唔過，因為佢搞鐵路已鑊鑊新鮮鑊鑊甘咁話。
卓妮