中環出更：談夫妻相處張詩培自封家中首長
當一段婚姻若想長長久久，需要極大智慧。早前香港工商界婦女濟濟一堂，卓妮同唔少女士講起呢個話題，港區婦聯青年委員會副主任張詩培（Joanne）同做律師嘅老公徐永安結婚就嚟十二年，佢形容自己係屋企嘅「行政長官」喎！照咁講，即係佢話晒事？其實唔係嘅，Joanne笑笑口話，佢老公嘅權力更加大，係最高領導人咁話。
Joanne話，自己同老公係朋友圈中公認嘅恩愛夫妻，兩人相處要軟硬兼施、進退得宜，所以自己有時扮吓老虎乸，有時就扮吓綿羊仔。不過兩公婆難免會嗌交，通常嗌完交都係老公氹番佢，因為男士要有紳士風度先啱嘛！
同場仲有中華總商會會董張俊勇嘅外母傅金珠、「金槌拍賣官」金鈴及立法會前議員劉健儀等人。劉健儀就講起，女人結婚後要平衡家庭同工作並唔容易，好多女性一旦取得平衡後就安於現狀，佢認為好可惜，鼓勵女士應該要繼續向上爬，始終工作嘅女性最有魅力咁話。
林淑儀呻勸唔到象哥戒煙
立法會議員黃定光（象哥）太太林淑儀都喺度，佢同象哥經常喺公開場合耍花槍，兩公婆相處實有好多心得。林淑儀就話，雖然兩人平時各有各忙，好少喺屋企食飯，但佢有時間，都會下廚煮兩味拿手小菜氹吓象哥。講講吓，佢忍唔住呻話，咁多年嚟最勞氣嘅就係勸唔到象哥戒煙，仲話勸極都勸唔聽喎！象哥，識做未吖？
卓妮