政情：獲日本大學頒博士 陳家亮好驚訝
唔知大家有冇試過，明明冇參加比賽又突然攞獎呢？中文大學醫學院院長陳家亮最近就突然獲大阪市立大學頒授名譽博士銜，佢接受查詢時話好驚訝，事前唔知自己被提名。聽落認真驚喜嘞！
首名非日本學者獲此殊榮
中大醫學院喺社交網站貼文指，陳家亮係該校首名非日本的學者獲得呢個殊榮，截至去年底，呢間學校只係頒授咗十二個名譽博士學位，全部都係日本人攞到。
陳家亮話，喺兩三個月前收到呢間學校通知，會喺畢業典禮向佢頒授名譽博士銜，估計同佢嘅學術研究及國際知名度有關，該校唔係每年都頒名譽博士銜o架，今次仲要得佢一個攞到添，覺得好榮幸，仲特別帶埋大女去現場幫自己打氣咁話。