政情：何君堯搵食爆金句 「啃得落蝦殼先係年輕」

呢個新節目叫做《阿堯四圍走》，首道菜係豉油王大蝦，佢話鍾意連殼食，仲語重心長咁話，連蝦殼一齊食，即係證明係年輕，頂得順，啃得落硬嘢，又話人生就係咁，軟又要受，硬嘅亦要接受。咁係咪暗示緊自己仲係好年輕呢？

講完人生大道理之後，佢仲爆金句。話說梅菜蒸肉餅上枱後，佢一邊大啖大啖食，仲突然轉Channel講客家話，話「客家人最鍾意食梅菜刴豬肉，好好食」，跟住話食咗梅菜嘅人，個人就冇咁霉。

索威士忌加茶通鼻塞

食完幾道菜飽肚後，應該散場喇，但竟然仲有彩蛋，大家估唔估到係乜嘢？可以紓筋絡嗰喎。唔係活絡油呀，係威士忌加茶。咩飲法呀？佢話因為近排天氣不穩，好多人都感到鼻塞塞咁，只要索一索即舒筋活絡，鼻塞都即刻通晒呀！信不信由你嘞！

呢個節目出街後，都有好大回響，但有網友就話呢啲菜式唔係一般平民百姓食嘅，何君堯就急急解釋，話呢餐係款待朋友，下次就會落區尋找街坊美食，事關烹飪高手在民間喎。