中環出更：兩區議員拗噪音問題 搞到休會

許話喺上年年底，有組織每個星期喺隆亨邨嘅公眾露天空地搞歌舞表演活動，影響到居民瞓唔到覺，又話喺空地附近有社區會堂，質疑點解啲人唔用社區會堂。佢希望房署可限制歌舞表演，仲話自己唱歌都幾好聽，揚言房署唔限制，佢就日日去房署喺隆亨邨嘅辦事處門口唱歌。

黃就認為依家有法例去處理噪音問題，冇必要喺區議會上討論，仲話任何時間都會有居民瞓覺，反問唔通任何時候都唔畀搞活動，覺得限制搞活動係過咗位。佢之後仲發言話如果覺得許把聲好嘈，影響議會安寧嘅話，反問係咪應該要叫許收聲呢？

其他人勸阻不果

話聲一落，許即喺冇開咪嘅情況下不停發言，聲稱係做緊示範，話自己把聲好悅耳，仲反問如果佢咁樣不停講嘢係咪會阻到黃。當時其他區議員都開聲叫許收聲，而委員會主席龐愛蘭亦嘗試勸阻，但許仍繼續講嘢，最終龐要宣布休會五分鐘。而喺休完會後，許同黃就冇再繼續爭拗嘞！

卓妮