中環出更：爸爸九十大壽 莊紫祥難忘「笨鳥先飛」身教
東華三院候任總理莊紫祥（Chris）早前大擺慈善壽宴，祝賀佢爸爸莊永釗九十大壽。諗起四十幾年前由福建來港時，一家人唔止住劏房，仲要六個人逼埋瞓一張碌架床，Chris感慨萬千，話爸爸一直堅持唔攞綜援，靠雙手養活一家人，佢仲喺爸爸身上學識「笨鳥先飛」嘅道理添！
「笨鳥先飛」？即係能力較差嘅人，想成功就要比人哋更勤力。Chris喺台上咁講，台下一眾好友當然話佢謙虛喇，做支付業務生意嘅Chris點會係笨鳥呢？香港義工聯盟常務副主席鄧清河就話記得當年兩人一齊捐錢做善事，大讚Chris有善心就真。
當晚去沾喜氣嘅仲有東華三院主席王賢誌及候任主席蔡榮星，事關主人家將以賀禮配對方式，捐出近一百萬元畀東華及義工聯盟，用作長者醫療及關懷長者之用。
鄧鉅明健康秘訣係「笑」
保良局總理鄧宣宏雁及老公鄧鉅明（Jimmy）都有到場，講起長壽，Jimmy都有長壽基因，因為佢媽媽已九十六高齡。Jimmy就笑笑口話，如果以百廿歲計，自己仲有近六十年壽命，想過好老年生活就要儲定「健康」，佢嘅秘訣係「笑」，同埋要一路工作，唔可以退休。鄧太就冇佢咁好氣，話六十幾歲就想退休周圍去玩，因為辛苦咗大半輩子，梗要享受吓人生。
晚宴仲有個有趣現象，就係有約十五圍姓莊嘅親戚出席，佔咗全場一半以上，認真墟冚，印證咗福建人重視家庭嘅坊間說法。難怪見慣場面嘅司儀都講笑，話可能係史上最多姓莊人士喺呢間酒店共聚添！
卓妮