政情：區鎮樺缺席交流會 疑避見林卓廷
十八個區議會定期都會到立法會同立法會議員舉行會議交流吓，傾吓地區問題。日前大埔區議會就到立法會同立法會議員會面，當日會議係由立法會議員林卓廷（阿廷）做召集人。一向被指與阿廷不和嘅大埔區議員區鎮樺原本都報咗名參加會議，但點知當日就臨時甩底。唔通因為冤家路窄，所以區索性唔去立法會？
大埔區議會喺本周二（19日）同立法會議員舉行會議。據了解，當日原本係由體育、演藝、文化及出版界立法會議員馬逢國出任該會議嘅召集人，不過喺開會前幾日，馬逢國就通知有事未能出席，所以就改由身兼北區區議員嘅阿廷任召集人，同區議員會面。
區稱前一晚肚痛唔舒服
區鎮樺一直被指同阿廷不和，去年佢高調退出與阿廷同屬嘅民主黨，仲發聲明鬧爆阿廷。被問到係咪為咗避見阿廷而缺席立法會會議，區就話只係因為前一晚肚痛唔舒服，所以先至冇出席，強調如果因為個別人士而缺席會議，係唔成熟嘅表現喎。