政情：蔣麗芸自爆讀過三間小學
尋日有一班德望學校（小學部）嘅學生去咗立法會參觀，期間就遇上學校師姐、立法會議員蔣麗芸（Ann）。阿Ann問學生叫唔叫得出佢個名時，班學生就嗌得出「蔣麗芸」三個字，其實都好難嗌唔出佢個名。
原本阿Ann要去開內務委員會會議，但一見到班小學生，就即刻行埋去問佢哋係咪想同議員影相。阿Ann仲問佢哋讀邊間學校，一聽到話係德望學校之後就勁興奮，仲自爆讀過德望添。班學生仲圍住阿Ann唱校歌，但阿Ann就冇份唱喇，事關佢話唔記得點唱喎。
轉校後英文講得「嘞嘞聲」
阿Ann透露，細個時讀過三間小學，讀咗幾年德望之後就轉咗去秀茂坪嘅屋邨小學，事關佢當年住觀塘，德望就喺牛池灣，返學要搭車之餘，學費仲比較貴。轉咗校之後，佢就可以行路返學，而且成績仲由中等偏差，變成校內最高分行列，英文科仲攞滿分兼「嘞嘞聲」。