政情：泛民再出招 狙擊梁君彥

二○一六年梁君彥競逐立法會主席時，民主派矛頭直指佢嘅國籍問題，事關《基本法》規定主席要由無外國居留權，且係香港永久性居民嘅中國公民擔任，梁最後臨急展示其國籍文件嘅正本，先勉強平息亂局，但唔少民主派議員至今仍然拒絕稱呼佢做主席。事件亦導致之後通過修改《議事規則》，規定主席候選人須簽署法定聲明，申報無擁有其他國籍。

到去年審議《廣深港高鐵（一地兩檢）條例草案》時，梁君彥又因為劃線限制議員發言而被批評濫權，因而被民主派議員提出不信任動議，雖然議案被否決，但因此而令他蒙上污點。同年七月，議事規則委員會副主席梁繼昌出招，去信議規會主席謝偉俊，要求修訂《議事規則》去限制主席擔任上市公司董事，而呢個建議亦喺尋日以問卷方式發放畀全體議員作諮詢，下月四日或之前要回覆。

有功能界別及建制議員反對

梁繼昌喺信中提出四項理據，認為主席要中立獨立，避免直接、間接、實質或觀感上有利益衝突，而主席應為全職，唔應該從事其他有薪工作，加上現時《議事規則》同議員個人利益登記冊嘅申報要求，未能反映主席有冇利益衝突，而且首屆立法會至今未有一位主席任內做過上市公司董事。

不過，呢個建議喺議規會中已存在分歧，好似有功能界別議員認為，議員要同選民有聯繫，放棄擔任上市公司董事或會導致無咗下屆當選資格喎。建制派副班長陳克勤就話，建制派無傾過梁繼昌呢個建議，但佢個人唔贊成修訂，因為現時申報機制好透明，亦限制某啲情況需要避席，仲話其黨友、議規會委員張國鈞都態度一致，而自由黨黨魁鍾國斌亦話傾向唔支持，反問點解主席唔可以做董事喎。

現時建制派擁有議會主導權，如果佢哋都唔支持建議，有機會令到建議喺問卷階段已壽終正寢，咁梁君彥就避過同民主派議員正面交鋒兼硬食批評，但距離明年立法會換屆仲有好長時間，如果民主派咬住唔放，睇怕佢都幾頭痕。