中環出更：趕唔切過財會 監察西九職位變真空
民政事務局上月向立法會人事編制小組委員會申請保留三個職位，以繼續監察西九文化區計劃，點知當局冇派人到場拉票，最終以一票之差被否決，真係甩晒轆，當局局長政治助理黎穎瑜更被批評唔知去咗邊。民政局都急急補鑊，再向小組提出討論。雖然尋日小組通過保留職位建議，但就趕唔切喺四月一日職位到期前獲財委會通過，該職位變相真空。
民政局：調配人手作過渡
財委會下次會議係本月廿九日，而當日已有其他議程，政府中人就話，當局都估計保留職位申請無法喺財委會插隊。民政事務局常任秘書長謝凌潔貞尋日都喺會上承認似乎趕唔切四月一日前喺財委會通過，當局會跟足規矩，按工作優先次序適當地調配人手，處理過渡期間嘅工作，又話希望過渡期短啲，否則要同公務員事務局商討應變措施。換言之，原有職位嘅工作可能要其他人分擔喇，既然調配人手就搞得掂，咁使乜開位呢？
卓妮