中環出更：老齡化嚴重蘇西智籲長者鍛煉雙腳

蘇西智又話，佢每星期都會同區內長者聚會，教佢哋做踢腳等動作，強化小腿肌力。至於佢自己就奉行日日行一萬步，咁就可以確保健步如飛喇。

博愛醫院董事局副主席李柏成（Jim）聽完都好認同要防患於未然，多啲提倡「治未病」概念。所謂「治未病」係中醫養生原則，即係喺病之前做好預防措施。Jim又透露，博愛遲啲會喺香港成立第一間治未病中心，推廣正確嘅保健、養生觀念，延遲老化或生病嘅時間。

藍王雲仙（右）一見到廖齡儀（左）即開心合照。

周駿達（左）身兼籌款活動籌委會主席，簡陳擷霞（右）都好支持佢。

當日係博愛醫院年度大型籌款活動嘅閉幕禮，好多屋邨長者出席，事關有關籌款活動為期長達七個月，多得唔少屋邨街坊幫手賣獎券及上門募捐。葵青區議會主席羅競成等多個區議會主席都有出席。而博愛董事局成員包括副主席簡陳擷霞、周駿達、總理藍王雲仙（Mina）及廖齡儀等人亦都在場。

藍王雲仙話返內地養老成風

Mina講起最近處理喺蘇州過身嘅公公嘅後事就好頭痛，因為公公有香港身份證，當地要求家屬注銷香港身份證先至可以處理火化等身後事，但係香港方面就要見到死亡證先至可以注銷，結果經過千辛萬苦先至搞掂。佢話，內地嘅退休環境好過香港，好多人返內地安老，呢種情況值得關注咁話。

卓妮