政情：怕街坊認錯人 李予信戴眼鏡轉形象
唔少後生仔打扮好類近，有時難免會被認錯。東區區議員鄭達鴻同佢徒弟李予信都係後生仔，又同樣眼大大，唔睇真啲又真係會撈亂。為免有街坊分唔清，李予信就特登佩戴眼鏡轉形象，不過佢笑笑口話，街坊其實分得出佢同鄭達鴻嘅。
十年跳街舞經驗 曾奪冠
其實李予信本身有近視，以前帶隱形眼鏡，依家轉番戴眼鏡啫！見佢眼大大，幾靚仔，佢自爆有人話佢似藝人余文樂，但係佢就唔太鍾意畀人咁講喇。咪睇佢斯斯文文，其實佢有十年跳街舞經驗，最拿手跳霹靂舞（Breakdance），仲曾經喺跳舞比賽中奪得冠軍。
講開跳街舞，不得不提都有跳街舞嘅民主黨立法會議員鄺俊宇，李予信就話鄺俊宇跳嘅種類比較多，以前跳街舞係要靠睇錄影帶自學，所以睇過鄺嘅舞技，都幾欣賞，若有機會都想比拚一下喎！