政情：政府商販傾掂數 架空議員講聲都冇

食物及衞生局副局長徐德義去年六月親自上陣，就涉款逾億元嘅大圍街市安裝空調系統工程到財務委員會尋求撥款，最終大比數獲得通過。不過，當時商販嘅安排仍未有最終方案，唔少議員喺會上都擔心街市全封時間太長，搞到商販手停口停。政府最初只肯提供三個月免租期，令到唔少商販不滿，因而尋求立法會議員介入。

柯仔：當局應該知會委員會

翻查資料，商販曾多次反對免租安排，過程亦有立法會議員參與當中。上星期大圍街市管理諮詢委員會終於落實咗安裝空調工程，工程將於今年五月起分三階段進行，街市只會喺最尾階段全面封閉七個月，至於商販嘅免租方面，就多咗免收一年冷氣費嘅安排，據了解呢啲細節係由食環署副署長陳靜婉喺三月初與商販傾掂嘅。

整個工程安排終於有定案，而且商販亦有更多優惠，聽落好似皆大歡喜。不過，立法會研究公眾街市事宜小組委員會主席柯創盛（柯仔）就話，政府同商販成功達成共識解決糾結已久嘅問題，但當局都有需要通知曾經介入過嘅議員，大嘆當局有架空立法會之嫌。而睇番呢個委員會工作由去年三月展開，一共舉行咗七次會議，工作期限喺今個月初屆滿，但柯仔就話一直以呢個委員會主席身份約見食衞局同食環署，就算委員會完成工作都應該要知會一聲喎。

求證不獲覆 葛珮帆好勞氣

有份協助嘅立法會議員葛珮帆就話，曾經就免收一年冷氣費與部門傾談不果，再隔一排就獲悉部門直接同商販傾談有結果，佢向政府求證消息但又不獲回覆，直言覺得好勞氣，唔知對方咩心態。佢強調議員一心想大團圓結局而幫手，但係食環署嘅做法就莫名其妙。

立法會對事態發展後知後覺，但其實地區層面亦都一樣，好似大圍街市管理諮詢委員會成員、沙田區議員董健莉，都係從商販口中得悉部門直接與商販傾好方案，政府部門就解釋指時間倉促，前排又忙於同商販傾喎！難怪董健莉大嘆，新方案雖然釋出善意，但欠缺透明度，亦都唔尊重民意代表喇！本報曾向有關政府部門求證，但截稿前仍未獲回覆。

話時話，政府成日話要改善行政、立法關係，今次政府部門連同幫過手協調嘅民意代表打個招呼都懶，又點期望長期保持良好關係呢？