中環出更：彭志宏為同囝囝分享 重拾砌模型嗜好
唔少為人父母者，都會想將自己嘅興趣傳畀下一代。樂善堂副主席彭志宏（Peter）最近就重拾學生時代砌模型嘅嗜好，目的係為咗同囝囝分享。Peter憶述自己讀小學時，因不時途經九龍城寨附近一間模型舖，所以就愛上砌模型，初時係砌跑車、手槍同飛機，後來就集中於軍事模型，所以今次再砌過，就買咗盒坦克模型過吓癮。
同好多模型發燒友一樣，Peter都有「爛尾」經驗。有次砌緊一副水陸兩用飛機模型，砌到一半就丟低咗，心諗第日再完成佢，誰知當佢再記番起時，竟然再搵唔番，所以佢希望囝囝日後如果砌模型，一定要有始有終。
仔女太活潑 任俊彥忍手唔玩高達
呢一日係樂善堂嘅活動，該堂主席李聖潑、副主席陳李玉佩、常務總理任俊彥、溫文蕙同埋當年委員陳嘉華都喺度。任俊彥以前都鍾意砌高達機械人模型，依家仔女仲處於好奇又活躍嘅成長階段，為免嘔心瀝血嘅作品遭遇不測，惟有忍吓手唔玩住。對於「男人愛高達，女人唔明白」呢句模型發燒友都耳熟能詳嘅說話，任俊彥都話，一堆塑膠零件竟令男人廢寢忘餐，女士確係感到費解，所以好多模型愛好者一旦拍拖，就會慢慢淡忘模型喇！
仁愛堂總理譚健業就認為，砌模型講求慢工出細活，同今時今日嘅速食文化大異其趣，若果想向年輕人推廣，就要試吓由流行文化入手。陳李玉佩同家人就鍾意一齊砌拼圖，雖然及唔上砌模型咁複雜，不過兩者都要講求手眼協調、耐心同埋專注力嘅。
卓妮