政情：張綺媚鍾情貓公仔 細個見親都買
唔同年代嘅小朋友都有唔同嘅兒時玩意，好似以前流行一時嘅椰菜娃娃，依家嘅小朋友就未必識。香港玩具協會主席張綺媚話，細個時都有玩椰菜娃娃，事關爸爸嘅工作係生產呢款玩具，所以佢都經常玩，不過佢最鍾意嘅就唔係椰菜娃娃，而係某隻非常出名嘅貓公仔，細個嘅時候幾乎一見到就會買，時至今日都有過百隻收藏喺屋企添。
張又話，小朋友嘅玩具「萬變不離其宗」，通常只係加啲新元素，好似以前興扭計骰，依家就變成扭計蛇。張有過百隻貓公仔，不過香港工業總會主席郭振華就話佢細個好少買玩具喇，反而最近就多咗一件新「玩具」，就係佢第一個乖孫。
郭振華操肌抱孫
郭仲話，因為擔心自己年紀大咗會手軟腳軟，抱唔實個孫，所以之前就同太太一齊勤力做運動，鍛煉番啲肌肉。問到佢個仔有冇同佢取「湊仔經」，郭就話今時今日科技咁發達，上網隨便都搵到一大堆資訊，所以雖然個仔係新手爸爸，但講到湊仔可能仲熟手過佢咁話。