政情：蒲吧被嘲似阿爸搵女 徐子見打呔挽救形象
喺二○一五年擊敗前立法會議員鍾樹根、成為東區區議員嘅徐子見（Andy）嘅打扮一向不修邊幅，平時落區見街坊都好少打呔，但近日就頻頻着恤衫打呔示人，仲喺社交網站上載自己新造型照片。有人就留言問佢係咪去「追女仔唔出聲」，究竟佢點解要換新形象呢？
新造型網民幾受落
Andy話，佢早前同一個後生仔去中環蒲酒吧，但就被嗰位後生仔話佢好似「阿爸落去搵自己個女」咁。佢話作為一個男士聽到人哋講啲咁嘅嘢，為咗保持形象，一定要改善吓，所以就決定要日日打呔，直至嗰位後生仔唔再咁講為止喎。
網民見到Andy嘅新造型似乎都幾受落，仲話男人執正啲都係照顧自己，但亦有人問佢係咪為咗去追女仔。不過最搞笑係有網民留意到佢手上隻錶，話佢隻錶好靚，似乎畀隻錶搶咗焦點喇。