中環出更：落力回饋社會 蔡孟真寧做「跪婦」不做貴婦
香港台灣新女性協會（協會）早前舉辦「中國風之夜」晚宴，一眾來自台灣嘅政商界人士濟濟一堂。海外潮人企業家協會常董王夏陽（Sunny）當晚都在場，原來佢同協會創辦人蔡孟真（Jenny）嘅老公沈振權自細玩到大，當年仲有份做沈振權伴郎，去台灣迎娶Jenny添！Jenny就話好感謝老公支持，所以佢先至可以有貴婦唔做，而拋身出嚟做「跪婦」喎。
Jenny喺五年前創辦協會，佢形容一路走來，酸甜苦辣都試過晒。有朋友問佢點解唔喺屋企做少奶奶，佢就話有能力就要回饋社會，付出得多，其實得到嘅更多，人生閱歷亦豐富咗，仲話新時代女性都可以好似「跪婦」咁，勤力奉獻社會。沈振權就笑住形容協會係太太嘅「事業」，認真幽默。
高銘村自爆未婚
出席晚宴嘅仲有台北經濟文化辦事處代理處長高銘村、香港台灣婦女協會會長陳念慈及國際華商協進會顧問會長陳趙滿菊等人。講起中國風，着西裝出席嘅高銘村笑笑口話，從來都冇着過中式衫，好多人細個都會被父母打扮成中國娃娃，但係佢都未試過。講講吓，佢自爆仲未結婚，因為工作太忙，姻緣未到。
嶺南大學校董黃仰芳（Fonia）當晚都喺度，事關Jenny係佢嘅大嫂，平時好少公開現身嘅Fonia老公沈振勤都陪住出席。Fonia笑稱老公唔鍾意應酬，今次肯出動，係因為嚟撐大嫂咁話。
卓妮