政情：後生搵食冇得曳 蕭楚基蒙德揚係奮青
香港話劇團尋日舉行「奮青樂與路」品格教育音樂劇計劃啟動禮，冀藉着藝術引導時下年輕人搵到正能量，話劇團主席蒙德揚同第一副主席蕭楚基都有到場。講起後生仔話題，唔知佢哋後生時有冇曳過，係「憤青」定「奮青」呢？
蕭同時打三份工
蕭楚基話係住屋邨出身，要搵食，唔得閒做憤青。記得當年要同時打三份工，做物業管理、揸的士同埋地產經紀，日日朝七晚十二，捱了三年先至儲到第一桶金去發展自己嘅事業。
家族做電器起家嘅蒙德揚含住金鎖匙出世，照計唔使捱喇，點知佢笑稱唔係喎。因為後生時被爸爸派去日本工廠，當時住男子宿舍，朝早六點半就打鐘起身，最難忘係到夜晚十一點時，夏天熄冷氣，冬天就熄暖氣，惟有夏天除多件衫、冬天冚多張氈。諗起嗰段日子都幾難忘，特別係夏天熄咗冷氣之後，成班男仔除剩條底褲，熱辣辣又瞓唔着覺，就飲啤酒消吓暑，呢班當時一齊捱過嘅兄弟，至今仍然係事業上嘅好拍檔。