政情：傾醫療券官員冇影 食衞局當區會透明
政府早排話要檢討醫療券，但大埔區議會轄下一個委員會尋日討論醫療券時，冇一個相關政府官員出席，席間唔少區議員對政府冇影都好不滿，當中有區議員點名譴責食物及衞生局，亦有區議員鬧爆話要對住空氣講嘢，浪費議會時間。作為食衞局局長嘅陳肇始，究竟有冇心聽民意o架？
話說大埔區議會轄下嘅社會服務委員會尋日開會，討論增設兒童醫療券，民建聯胡健民話政府為兒童提供嘅健康服務都係屬於檢查性，唔係治療或醫療性。仲話兒童醫療嘅開支需求大，如果有醫療券就可以幫到有需要嘅家庭，同埋令小朋友得到保障。委員會主席譚榮勳就話食衞局透過書面回覆話派唔到代表出席會議，同埋政府已就兒童健康投入資源，認為未有急切需要推行兒童醫療券。
周炫瑋扯火 話對空氣講嘢
議案雖然係由建制派提出，但唔少民主派都表明支持議案，仲希望政府可以擴闊醫療券嘅受眾範圍，包括長期病患者、殘疾人士等等。面對政府當局冇影，新民主同盟關永業就要求去信食衞局，希望佢哋出席會議，直接解答最近醫療券嘅問題。佢嘅黨友任啟邦同周炫瑋就形容依家要對住空氣講嘢，其中周就鬧爆話次次跟足規矩，早十日去信要求局方出席，但最終都係冇影，覺得浪費議會時間；民主派劉勇威就直情話要譴責食衞局，仲話尋日個會有幾個議案都同醫療有關，但局方都唔派人出席，覺得好離譜。
譚榮勳會再去信 表達不滿
見班同僚群情洶湧，譚榮勳就話會綜合議員對醫療券嘅意見，再去信局方同邀請對方再出席會議，而且仲要求，要喺信中加埋區議會對局方缺席感到不滿，希望局方可以重視會議，派人出席。
唔止食衞局缺席，會議之後傾到有關要求在職家庭津貼辦事處改善派發「關愛共享計劃」派四千蚊嘅現金支票安排時，職津辦又同樣冇影，淨係書面回覆話會積極研究，不過提出議案嘅周炫瑋今次就只係話失望。
兩項議程都係基層好關注嘅事項，但班官睬都唔睬吓，唔怪之得出嚟啲政策咁離地喇！