中環出更：為攬甩轆黨友 公民黨放生鄭若驊
公民黨（公文袋）立法會議員楊岳橋（AY）今年一月喺立法會大會甩轆，因不在席而無法動議佢提出嘅一個有關單程證嘅議案。其黨友、法律界議員郭榮鏗（Dennis）讓出於本月廿七日大會提動議嘅機會畀佢補鑊，放棄原本打算提出嘅對律政司司長鄭若驊嘅不信任動議，變相放生咗鄭，點知最後AY都係被人「截胡」。AY接二連三甩轆，Dennis為攬黨友連狙擊鄭都要擺埋一邊，值唔值真係該黨自己先知喇。
郭榮鏗辯稱形勢有變
對於被質疑放生鄭若驊，Dennis解釋係因形勢有變，而且佢之前已喺立法會大會同司法及法律事務委員會上，傳召過鄭到立法會以及提過對鄭嘅不信任動議，所以冇必要即時再提出不信任動議，所以就讓畀AY。至於幾時先再喺大會對鄭提不信任動議，佢就話要等下次抽籤再睇情況。須知議員能否提出議案要靠抽籤決定，幾時抽中都要睇運數，唔好運起上嚟，分分鐘今屆立法會完結都未提到呢個動議。
另外，由於AY本月廿七日想重提嘅單程證議案已被議員范國威「截胡」，將喺下周三討論，所以公文袋決定廿七日AY嘅議案會改為修訂《逃犯條例》相關內容。
卓妮