中環出更：香港擁專利技術 阮重文時機成熟推動智能錶
香港鐘表業總會早前舉行就職典禮，錶界名人雲集，不過現場有位稀客，就係法國五月董事局主席阮偉文啦！見佢同多名家人齊齊出席，其中有一位男士同佢成個餅印咁，原來係佢細佬阮重文（Paul）。Paul係今屆嘅新會董，佢話家族做電子業已六十年，近年食正潮流條水做智能錶，總會卸任主席孫大豪係佢中學同學，所以就應邀加入做新丁會董喇！
Paul加入係有重要任務嘅。佢話佢哋做嘅智能錶外貌同傳統手錶冇分別，因為有專利技術，將顯示屏收埋咗，但係所有噏得出嘅智能功能都有，反而佢有嘅，人哋未必有。雖然咁正，但係未有自家品牌，只係幫人代工。佢話孫大豪父親孫秉樞已叫佢入會好多年，希望帶動業界做好智能錶，最近佢見政府及業界都已凝聚到共識去做，自己亦覺得香港有能力做，唔可以再跟喺人哋後面，所以時機成熟就入會做好佢。
今屆會董會有唔少新面孔，包括鐘錶集團高層曾子禧（Anthony）。講起近年來鐘錶業經歷「過山車」式嘅發展，Anthony就話七、八年前市場最旺時，內地客最鍾意買鑽石錶，後來「降呢」買金錶，依家就買又平又襟嘅鋼錶，戴個運動款就算，聽落真係幾唏噓。
李永安：鐘錶業冇得取巧
新任主席李永安就話鐘錶業係冇得取巧嘅行業，雖然受到保護主義抬頭、英國脫歐等因素影響，經濟環境唔明朗，但係香港鐘錶出口高達七百億元，而且仲係瑞士錶嘅最大出口市場，業界應對未來保持樂觀。
卓妮