政情：楊位醒寓賽於操 備戰馬拉松
香港餐務管理協會會長楊位醒（醒哥）同好多港人一樣，都面對工時長，唔夠空餘時間做運動，但佢酷愛長跑運動，不但每年參加馬拉松賽事，更會報多幾次長跑賽事，一於「寓賽於操」，以彌補運動時間不足之憾。其實醒哥年輕之時已經係體壇活躍分子，做過教練同球隊管理，所以跑多幾場都冇問題。
醒哥話，平時一星期練跑兩次共廿五公里，再加踩單車三十公里。而每逢馬拉松賽事舉行之前兩個月，操練會更密集。至於上月嘅馬拉松賽事，醒哥就由過往跑開嘅十公里，首次「升呢」挑戰超過廿一公里嘅半馬賽事，雖然順利跑畢全程，但要應付長一倍嘅距離絕不輕鬆，尤其是跑出西隧即急速上斜走天橋嘅路段極耗體力，非常難捱。
太太唔畀夜跑
跑馬拉松好靠平日鍛煉以强化體能，但由於醒哥要日間工作，太太又唔容許佢夜間練跑，於是醒哥就計劃今年至少要報多三至四個長跑賽事，藉賽事來鍛煉耐力。