政情：開餐廳賣盤賺兩倍 高偉國：做實業都有得賺
香港人鍾意買樓保值、炒股賺快錢，成日都話做實業冇乜錢賺。香港表廠商會副會長高偉國（Tim）自言好少買股票，多數係投資基金同做實業。佢原本喺香港經營兩間餐廳，早前賣咗其中一間日本串燒店，兩年間即賺一、兩倍，認真和味，難怪佢信心滿滿，諗緊再開多間添！
開餐廳最重要好食
Tim話，炒股要日日睇住個市，要好得閒，如果每日只係炒高低，贏嘅機會大，但係會好忙囉，佢就寧願做長期少少嘅投資。依家仲有一間主打東南亞菜式嘅餐廳，位於家族鐘錶集團喺黃竹坑嘅寫字樓地下，開業第二年已經回本，對於餐廳嚟講都算快。唔知佢有咩必勝秘笈？佢就笑笑口話，最重要係好食，同埋地點好，其中又以好食重要啲，否則地點幾好都冇用。